13 Dekabr 2021 11:12
Cari ilin 11 ayı ərzində 211 uşaq üzərində kardiocərrahi əməliyyat icra olunub
2021-ci ilin yanvar-noyabr ayları ərzində icbari tibbi sığorta çərçivəsində 211 uşaq üzərində kardiocərrahi əməliyyat icra olunub. Əməliyyatlar İcbari Tibbi Sığorta üzrə Dövlət Agentliyinin (Agentlik) müqavilə bağladığı özəl tibb müəssisələrində və Tibbi Ərazi Bölmələrini İdarəetmə Birliyinin (TƏBİB) tabeliyindəki tibb müəssisələrində həyata keçirilib. Əməliyyat olunan şəxslər arasında 2-3 aylıq körpələr də olub. Ölkənin müxtəlif şəhər və rayonlarında yaşayan vətəndaşlar növbəlilik prinsipi əsasında əməliyyat olunublar. Məlumat üçün bildirək ki, vətəndaşlara verilmiş göndərişlər əsasında müqaviləli tibb müəssisələri tərəfindən tibbi xidmətlərin göstərilməsi və onların elektron reyestrdə qeydiyyatı davam edir.
Qeyd olunmalıdır ki, perinatal dövrdə meydana çıxan ürək-damar pozuntuları, qan-damar sisteminin anadangəlmə inkişaf qüsurlarının müayinə və müalicəsi icbari tibbi sığortanın Xidmətlər Zərfi çərçivəsində qarşılanır. Əməliyyat zamanı istifadə olunan dərman və tibbi sərf, reanimasiya və stasionarda yatış, yatış müddətində təyin edilmiş laborator və instrumental müayinə xərcləri, histopatoloji, sitopatoloji müayinələr, fizioterapiya, həkim təqibi Xidmətlər Zərfi çərçivəsində təmin edilir.
Son zamanlar müxtəlif media mənsublarında ayrı-ayrı şəxslərin cərrahi əməliyyat olunmaları üçün əhalidən vəsait toplamaq məqsədi daşıyan müraciətlərə rast gəlinir. Bu yaxınlarda məşhur media qurumu tərəfindən dərc olunan 3 yazı Agentlik tərəfindən araşdırılmışdır. Həmin şəxslərlə əlaqə saxlanılarkən məlum olmuşdur ki, onlara icbari tibbi sığorta çərçivəsində tibbi xidmətlər göstərilmişdir. Vəsaitin toplanılması isə əslində xəstəliklə əlaqədar digər ehtiyacların qarşılanması ilə bağlı olmuşdur.
Vətəndaşların və kütləvi informasiya vasitələrinin nümayəndələrinin bir daha diqqətinə çatdırmaq istərdik ki, icbari tibbi sığortanın Xidmətlər Zərfi ilə 2550 sayda tibbi xidmət təminata alınır. Tibbi xidmətlərin 950-sini cərrahi əməliyyatlar təşkil edir. Həmin əməliyyatlar sırasına koxlear protez cihazının implantasiyası və ya dəyişdirilməsi, oynaqdaxili endoprotezləşdirmə, aorto-koronar şuntlama əməliyyatı, ürək qapaqlarının dəyişdirilməsi və təmiri, anadangəlmə ürək qüsurlarının cərrahi müalicəsi, eləcə də minimal invaziv üsulla həyata keçirilən kardiocərrahiyyə əməliyyatları və bir sıra digər əməliyyatlar daxildir. Qeyd edək ki, dövlət proqramları çərçivəsində müalicə və müayinəsi qarşılanan xəstəliklərlə bağlı tibbi xidmətlər, habelə kosmetik prosedurlar və plastik cərrahiyyə, orqan transplantasiyası, süni mayalanma və stomatoloji xidmətlər icbari tibbi sığortanın Xidmətlər Zərfinə daxil deyil.
Vətəndaşlardan, eləcə də kütləvi informasiya vasitələrinin nümayəndələrindən xahiş olunur ki, Xidmətlər Zərfi çərçivəsində tibbi xidmətlərin göstərilməsi ilə bağlı çətinlik olduqda ilk növbədə aidiyyəti quruma (tibb müəssisəsi/TƏBİB/Agentlik) müraciət etsinlər.
Xəbərlər
Təxliyə zamanı həyati təhlükəsi olanlara təcili tibbi yardım göstərməyə imkan verən yeni ambulanslar alınıb
18 Mart 2024 12:40
Qlaukomanın müayinə və müalicəsi icbari tibbi sığorta ilə qarşılanır
12 Mart 2024 12:23
İcbari tibbi sığorta üzrə xidmətlərin göstərildiyi Liv Bona Dea Hospitalına media-tur təşkil edilib
06 Mart 2024 17:00
Vətəndaşlara özəl tibb müəssisələrini elektron qaydada seçmək imkanı verilib
05 Mart 2024 15:55
Zaur Əliyev Abşeron rayonunda vətəndaşları qəbul edib
23 Fevral 2024 17:00
İcbari tibbi sığorta ilə eşitmə qabiliyyətinin bərpası üçün 317 nəfər əməliyyat olunub
23 Fevral 2024 14:57
“1542” Çağrı mərkəzinə daxil olan zənglərin 93%-dən çoxu cavablandırılıb
22 Fevral 2024 14:34
Böyrək daşlarının kəsiksiz xaric edilməsi icbari tibbi sığortaya daxildir
20 Fevral 2024 10:45
Agentlik Kommunikasiya Strategiyasını uğurla icra edib
14 Fevral 2024 14:44
Ötən il ərzində İcbari Tibbi Sığorta üzrə Dövlət Agentliyinə 11 771 vətəndaş müraciəti daxil olub
09 Fevral 2024 11:17