01 Noyabr 2017 11:54
Pilot ərazilərdə süd vəzisinin xərçənginin və prostat vəzinin xəstəlikləri üzrə sağlamlıq həftələri başa çatıb
İcbari Tibbi Sığorta üzrə Dövlət Agentliyi pilot ərazilərdə - Mingəçevir şəhərində və Yevlax rayonunda 02-15 oktyabr tarixlərində süd vəzisinin xərçəngi, 09-22 oktyabr tarixlərində prostat vəzi xəstəliklərinin profilaktikasına həsr olunmuş sağlamlıq həftələri təşkil etmişdir. Sağlamlıq həftələri çərçivəsində müayinələrdən keçənlərin sağlamlıq vəziyyətini və müalicə-profilaktika tədbirlərinin səmərəliliyini qiymətləndirmək məqsədilə hazırlanan registr sisteminin məlumatları təhlil edilib.
Süd vəzisinin xərçəngi sağlamlıq həftələrində sakinlərin aktiv iştirakı müşahidə edilmişdir. Bunu diqqətə alaraq süd vəzisinin xərçənginin yaranması və inkişafına təsir edə biləcək bir sıra xəstəliklərin aşkarlanması məqsədilə əlavə müayinələrin keçirilməsi də təşkil olunmuşdur.
Toplanan məlumatlardan məlum olmuşdur ki, süd vəzisi sağlamlıq həftələri ərzində müxtəlif yaş qruplarına aid 552 qadın tibbi müayinələrdən keçmiş və ixtisaslı həkimlər tərəfindən onlara müvafiq məsləhətlər verilmişdir. 112 qadına instrumental müayinələrdən, 48 nəfərə isə laborator müayinələrdən keçmək üçün göndəriş verilmişdir.
Müraciət edən vətəndaşların 53 nəfəri 16-25 yaş, 134 nəfəri 26-35, 149 nəfəri 36-45 yaş, 122 nəfəri 46-55 yaş, 86 nəfəri 56-70 yaş arasında, 8 nəfəri isə 70 yaşdan yuxarı olublar.
Müraciət edənlərin tibbi müayinələrdən keçmə tezliyi də müxtəlifdir: 210 nəfər son 1 ay ərzində, 71 nəfər 3 ay öncə, 49 nəfər son altı ay ərzində, 68 nəfəri 1 il ərzində, 30 nəfər isə son 3 il ərzində tibbi müayinədən keçmişdir. 3-5 il ərzində müayinələrdən keçənlərin sayı 30 nəfər təşkil edib. 94 nəfər sonuncu dəfə tibbi müayinədə 5 və daha çox il öncə olub. Əldə olunan statistik göstəricilər deməyə əsas verir ki, icbari tibbi sığortanın tətbiqi ilə pilot ərazilərin sakinlərinin müayinələrə cəlb olunma tezliyində artım müşahidə olunmuşdur. Belə ki, ümumi müraciət etmiş 552 nəfərdən 330 nəfəri son 6 ay ərzində müayinələrdən keçib.
Müayinələr zamanı 379 nəfərdə süd vəziləri ilə bağlı patologiyalar və yenitörəmələr aşkarlanmışdır. Digər müraciətçilərdə süd vəzisi ilə bağlı heç bir patologiya görünməmişdir.
Sidik-cinsiyyət sistemi xəstəliklərinin erkən aşkarlanması, mümkün qədər tez müalicəyə cəlb edilməsi məqsədilə təşkil edilmiş və prostat vəzi xəstəliklərinin profilaktikasına həsr olunmuş sağlamlıq həftələrində 197 nəfər kişi müxtəlif şikayətlərlə ASM-lərə müraciət etmişdir. Onlardan 54 nəfərə instrumental müayinələrdən, 65 nəfərə isə laborator müayinələrdən keçmək üçün göndəriş verilmişdir.
Müayinələrdən keçənlərin 3 nəfəri 0-15 yaş, 9 nəfəri 16-25 yaş, 36 nəfəri 26-35, 35 nəfəri 36-45 yaş, 36 nəfəri 46-55 yaş, 55 nəfəri 56-70 yaş arasında, 23 nəfəri isə 70 yaşdan yuxarı olublar.
Sakinlərin tibbi müayinələrdən keçmə tezliyi də müxtəlifdir. Belə ki, 62 nəfər şəxs son 1 ay ərzində, 34 nəfər 3 ay öncə, 25 nəfər son altı ay ərzində, 31 nəfəri 1 il ərzində, 9 nəfər isə son 3 il ərzində tibbi müayinələrdən keçmişdir. 36 nəfər sonuncu dəfə 5 və daha çox il öncə tibbi müayinədə olub.
Sidik-cinsiyyət sistemindən şikayətlərlə bağlı müraciət etmiş 197 nəfərin 110-da erkən mərhələdə müxtəlif xəstəliklər (prostatit, uretrit, prostat vəzin adenoması, sistit, pielonefrit və s.) aşkar edilmişdir. Digər müraciətçilərdə sidik-cinsiyyət üzvləri ilə bağlı heç bir patologiya aşkarlanmamışdır. Prostat vəzinin xəstəliklərinin profilaktikası üzrə sağlamlıq həftələrinin iştirakçılarına sağlam həyat tərzi, cinsi yolla yoluxan xəstəliklər və sidik-cinsiyyət sisteminin patologiyalarının ilkin əlamətləri haqqında məlumat verilmişdir.
Əhalinin sağlamlığının qorunması, ixtisaslı tibbi müayinələrə əlçatanlığının təmin edilməsi, xəstəliklərin erkən aşkarlanması və ağırlaşmaların qarşısının alınması məqsədilə İcbari Tibbi Sığorta üzrə Dövlət Agentliyi Milli Onkologiya Mərkəzi (MOM) ilə birlikdə 10-12 oktyabr tarixlərində Yevlax şəhər Ailə Sağlamlıq Mərkəzinin ərazisində yerləşdirilmiş MOM-un Mobil Diaqnostik Kompleksində müayinələr təşkil etmişdir. Kompleksdə ginekoloq, mammoloq, onkoloq, uroloq, radioloq, endokrinoloq və LOR həkim tərəfindən konsultasiyalar verilib, rentgenoqrafiya, mammoqrafiya və ultrasəs müayinələri aparılıb.
3 gün ərzində davam edən müayinələr ərzində 482 nəfərə xidmət göstərilmişdir və ümumilikdə 1404 müayinə aparılmışdır. 88 nəfər mammoqrafiya, 77 nəfər rentgenoqrafiya, 298 nəfər isə ultrasəs müayinəsindən keçmişdir.
Müayinələr zamanı 8 nəfərdə süd vəziləri, 24 nəfərdə qadın cinsiyyət üzvləri (uşaqlıq, uşaqlıq boynu, yumurtalıq və s.), 4 nəfərdə qalxanabənzər vəzi ilə bağlı patologiyalar və yenitörəmələr qeydə alınmışdır. 10 nəfərdə isə müxtəlif formada sidik-cinsiyyət sistemi ilə bağlı patologiyalar aşkarlanmışdır.
Xəbərlər
Zaur Əliyev Qubada vətəndaşları qəbul edib
23 Noyabr 2023 16:45
İcbari Tibbi Sığorta üzrə Dövlət Agentliyi media nümayəndələri üçün təlim keçirib
22 Noyabr 2023 16:00
Xəstəxanaların idarəedilməsi sahəsində 60 nəfər rəhbər heyət Türkiyə təcrübəsini öyrənir
14 Noyabr 2023 16:50
“Medinex” və “Beauty Azerbaijan” sərgilərinin açılış mərasimi keçirildi
02 Noyabr 2023 14:00
Süd vəzi müayinəsi icbari tibbi sığorta təminatına daxildir
31 Oktyabr 2023 09:10
İcbari tibbi sığorta ilə LOR əməliyyatları icra olunur
30 Oktyabr 2023 15:00
Zaur Əliyev Lənkəranda vətəndaşları qəbul edib
27 Oktyabr 2023 15:37
İcbari Tibbi Sığorta üzrə Dövlət Agentliyinin məlumatı
26 Oktyabr 2023 12:08
Xüsusi qayğıya ehtiyacı olan şəxslər üçün tibbi aksiyalar keçirilib
20 Oktyabr 2023 12:30
İcbari Tibbi Sığorta üzrə Dövlət Agentliyi informasiya sistemlərini “Hökumət buludu”na köçürüb
10 Oktyabr 2023 11:07