13 May 2022 16:05
“Qazilərin Gücləndirilməsi Layihəsi”nin ikinci mərhələsi başa çatıb
Mayın 13-də “Azərbaycanda xidmət göstərənlər üçün keçirilən psixososial dəstək təlimləri ilə qazilərin gücləndirilməsi layihəsi"nin ikinci mərhələsinin başa çatması ilə bağlı tədbir keçirilib. Qeyd edək ki, layihə Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi, Tibbi Ərazi Bölmələrini İdarəetmə Birliyi, Sosial Xidmətlər Agentliyi, Türkiyə Respublikasının İctimai İnkişaf Mərkəzinin Təhsil və Sosial Həmrəylik Dərnəyi (TOGEM-DER), Türkiyə Respublikasının Xarici İşlər Nazirliyi, Türkiyə Respublikasının Mədəniyyət və Turizm Nazirliyi, Ankara Universiteti və Ankara Ticarət Palatasının təşəbbüsü və təşkilatçılığı ilə ərsəyə gəlib.
Layihənin əsas məqsədi ölkəmizdə şəhid və qazi ailələrinə sahə xidməti göstərən psixoloq, psixiatr və sosial işçilərin bilik və bacarıqlarını artırmaq və bu sayədə müharibə iştirakçıları və şəhid ailəsi üzvlərinin ruhi və psixoloji vəziyyətinin yaxşılaşmasına nail olmaqdır.
Tədbirdə Agentliyin İdarə Heyətinin sədri Zaur Əliyev, TƏBİB-in İdarə Heyəti sədrinin vəzifələrini müvəqqəti icra edən Vüqar Qurbanov, TOGEM-DER İdarə Heyətinin sədri Füsun Türken Uysal, Ankara Universitetinin Sağlamlıq elmləri fakültəsinin dekanı Əminə Özmete, Türkiyə Respublikasının Azərbaycandakı səfiri Cahit Bağcı və Türkiyə Böyük Millət Məclisinin Ərizə Komissiyasının sədri, millət vəkili Mihrimah Belma Satır çıxış ediblər.
Tədbirdə çıxış edən Z.Əliyev layihənin ərsəyə gəlməsində dəstək olan Türkiyə Respublikasının qurumlarına təşəkkür edib və bu təcrübənin iştirakçılar üçün faydalı olacağına əminliyini ifadə edib. O əlavə edib ki, Agentlik qardaş ölkə ilə əlaqələrin inkişaf etdirilməsində maraqlıdır: “Biz daim Türkiyənin müvafiq səhiyyə qurumları ilə əməkdaşlığın genişləndirilməsinə çalışır, icbari tibbi sığorta və səhiyyə sahəsində Türkiyə təcrübəsinin öyrənilməsi istiqamətində mütəmadi olaraq qarşılıqlı səfər və görüşlər təşkil edir, birgə layihələr icra edirik”.
İdarə Heyətinin sədri həmçinin müharibə iştirakçılarının və şəhid ailəsi üzvlərinin daim dövlətin qayğısı ilə əhatə olunduğunu və Agentliyin bu istiqamətdə tədbirlər gördüyünü vurğulayıb: “2022-ci ilin yanvar-aprel ayları ərzində 6500-ə yaxın Vətən müharibəsi iştirakçısı və şəhid ailəsi üzvünə icbari tibbi sığorta çərçivəsində 47 mindən çox tibbi xidmət göstərilib”.
TƏBİB-in İdarə Heyəti sədrinin vəzifələrini müvəqqəti icra edən Vüqar Qurbanov isə Türkiyə Respublikasının daimi dəstəyini diqqətə çatdırıb: “Heç şübhəsiz ki, haqq savaşımızda qəhrəmanlıqla vuruşmuş qazilərimizin sağlamlıqlarına qovuşmasında Türkiyəli həkimlərin rolu danılmazdır. Bu günə qədər birgə əməkdaşlıq çərçivəsində Yaşat Fondu tərəfindən Türkiyəyə əməliyyat üçün göndərilmiş onlarla qazimiz qardaş ölkədə öz sağlamlıqlarına qovuşaraq vətənimizə qayıdıb”.
Türkiyə Respublikasının ölkəmizdəki səfiri Cahit Bağcı isə iki ölkə arasındakı əlaqələrin inkişafından və layihənin əhəmiyyətindən danışıb: “Sevindirici haldır ki, bu əhəmiyyətli layihəmizin bağlanış mərasimi Türkiyə və Azərbaycan arasında diplomatik əlaqələrin qurulmasının 30-cu ildönümünə təsadüf edir. Bu kimi sosial layihələrin isə davamlı olması üçün əlimizdən gələni əsirgəməyəcək, Türkiyədəki digər universitetlərin və sosialyönümlü qeyri-hökumət təşkilatlarının bu işə cəlb olunmasına çalışacağıq”.
Tədbirdə sonunda təlimçilərə və iştirakçılara müvafiq olaraq təşəkkürnamələr və sertifikatlar təqdim olunub.
Qeyd edək ki, layihənin cari ilin mart ayında keçirilmiş birinci mərhələsində vebinarlar keçirilib. May ayında Bakıda baş tutan 3 günlük təlimlərdə isə öyrənilən bilik və bacarıqlar təkmilləşdirilib. Layihəyə 70-dən çox əməkdaş cəlb olunub.
Xəbərlər
Zaur Əliyev Balakən rayonunda vətəndaşları qəbul edib
24 İyun 2022 17:40
May ayında icbari tibbi sığorta çərçivəsində 3,5 milyondan çox tibbi xidmət göstərilib
17 İyun 2022 14:30
Tibb ictimaiyyətinin nümayəndələri ulu öndər Heydər Əliyevin və Vətən müharibəsində şəhid olmuş həkimlərimizin məzarlarını ziyarət ediblər
17 İyun 2022 10:11
Uşaqlarda kistoz fibroz xəstəliyinin aşkarlanması üçün müayinələr aparılır
14 İyun 2022 14:27
Ankarada dövlət tibb müəssisələrinin rəhbər heyəti üçün keçirilən təlim başa çatıb
10 İyun 2022 18:00
İrsi xəstəliklərin erkən diaqnostikası məqsədilə ölkədə ilk dəfə neonatal skrininq müayinələr keçirilir
10 İyun 2022 11:35
Azərbaycanın 15 dövlət tibb müəssisəsinin rəhbər heyəti Ankara Universitetinin təlimində iştirak edir
08 İyun 2022 14:30
Hepatit B və C viruslarına yoluxmuş şəxslərə ödənişsiz dərman preparatları verilir
06 İyun 2022 10:00
Xarici ölkədə təhsil almış həkimlər Bakı və Sumqayıt şəhərlərindəki dövlət tibb müəssisələrində işə cəlb olunur
02 İyun 2022 10:34
İxtisaslı həkimlərin əməkhaqları artırılır
01 İyun 2022 10:56