20 Aprel 2023 14:40
Agentlik əlilliyin qiymətləndirilməsində şəffaflıq və operativliyin təmini məqsədilə pilot layihəyə start verib
İcbari Tibbi Sığorta üzrə Dövlət Agentliyi (Agentlik) tərəfindən əlilliyin qiymətləndirilməsi istiqamətində start verilmiş layihə çərçivəsində 20 aprel 2023-cü il tarixində Quba Rayon Mərkəzi Xəstəxanasına (Quba RMX) səfər təşkil edilib. Səfərin məqsədi media heyətini və Litva Respublikasının Milli Tibbi Sığorta Fondu (Tvininq layihəsinin) nümayəndələrini əlilliyin qiymətləndirilməsində vətəndaşların əyani baxışdan keçirilməsi qaydası, bu məqsədlə tibb müəssisəsində yaradılmış şərait və görülən işlərlə tanış etməkdir.
Agentliyin Tibbi planlama departamentinin rəhbəri Hikmət İbrahimli bildirib ki, əlilliyin qiymətləndirilməsi sahəsində şəffaflığın, obyektivliyin və operativliyin təmin edilməsi istiqamətində Agentlik tərəfindən müvafiq tədbirlər görülür: “Növbəti tədbir pilot layihənin icrası ilə bağlıdır. Layihənin əsas məqsədi tibb müəssisələrində Həkim Məsləhət Komissiyalarının (HMK) işini təkmilləşdirmək, göstərilən tibbi xidmətlərin keyfiyyətini artırmaq və vətəndaş məmnunluğunu təmin etməkdir. Layihənin icrasına ilkin olaraq Quba RMX-də başlanılıb. HMK-nın fəaliyyəti xəstəxanaya müraciət etmiş şəxsin və müalicə həkiminin əlilliyə göstərişin olmasına dair tibbi sənədlərinin, qoyulmuş diaqnozların düzgünlüyünə nəzarət etmək, 2022-ci ildə Nazirlər Kabinetinin qərarı ilə təsdiq edilmiş əlilliyin müəyyən olunması meyarlarına uyğunluğu yoxlamaq üçün vətəndaşın yerində əyani müayinəsini aparmaqdan ibarətdir”.
Quba RMX-nin direktoru Əliyar Sərvərovun sözlərinə görə, vətəndaşların HMK tərəfindən qəbulu və əyani olaraq tibbi yoxlamanın aparılması üçün xəstəxanada qəbul və müvafiq otaqlar ayrılmışdır: “Müayinə otaqları bütün lazımi avadanlıqlarla (elektrokardioqrafiya, exokardioqrafiya, bronxoskopiya, portativ rentgen, ultrasəs müayinə) təchiz edilib. Quba və Qusar sakinlərinin əlillik məsələləri üzrə müraciətləri ilə bağlı həftəlik xüsusi qəbul günləri müəyyən edilib. Burada həftə ərzində 70-100 vətəndaşın müraciətlərinə baxılır, mövcud sənədlər nəzərdən keçirilir, vətəndaşlar yerində müayinə olunur və müvafiq qərarın qəbulundan sonra toplanmış sənədlər Əmək və Əhalinin Sosial Müdafiəsi Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyinə yönləndirilir”.
Qeyd edilib ki, layihə çərçivəsində Quba RMX-də vətəndaşların rahatlığı və məlumatlara əlçatanlığı məqsədilə monitorlar quraşdırılıb. Monitor vasitəsilə vətəndaşlar yeni təsdiq edilmiş əlilliyin müəyyən olunması meyarları və müvafiq meyarlar üzrə gərəkli olan müayinələrin siyahısı ilə təsviri şəkildə tanış ola bilirlər. Bu zaman vətəndaşın şəxsi müayinələri arasında natamamlıq və ya dəqiqləşdirilməmiş diaqnoz olduğu təqdirdə yerində təkrar həkim tərəfindən yoxlanılmasına imkan yaranır. Bu da öz növbəsində vətəndaşın əlavə tibbi yoxlama üçün digər xəstəxanaya təkrar müraciət etməsinin, nəticədə vaxt itkisinin qarşısını alır.
Qeyd edək ki, pilot layihənin nəticələrindən asılı olaraq, əlilliyin qiymətləndirilməsi məsələləri üzrə ölkənin digər bölgələrində də mərkəzləşdirilmiş xəstəxanaların müəyyən edilərək layihənin icrasının davam etdirilməsi nəzərdə tutulub.
Xəbərlər
İcbari tibbi sığorta hesabına 145 transplantasiya əməliyyatı icra olunub
29 Avqust 2024 09:59
Zaur Əliyev Şəmkirdə vətəndaşları qəbul edib
27 Avqust 2024 17:47
Qastroskopiya müayinəsi icbari tibbi sığorta ilə qarşılanır
23 Avqust 2024 15:31
İcbari tibbi sığorta bud-çanaq oynağının süni protezlə dəyişdirilməsi əməliyyatını qarşılayır
20 Avqust 2024 10:22
Miomektomiya əməliyyatı icbari tibbi sığorta təminatına daxildir
15 Avqust 2024 12:03
İcbari tibbi sığorta şişönü xəstəliklərin erkən diaqnostikasını qarşılayır
12 Avqust 2024 09:34
Agentliyin “1542” Çağrı mərkəzi 95%-dən çox zəng cavablandırıb
07 Avqust 2024 14:37
Agentliyin müqavilə bağladığı tibb müəssisələrinin sayı 165-ə çatdırılıb
30 İyul 2024 11:19
Gəncə şəhərində uşaqlar tibbi müayinədən keçib
29 İyul 2024 12:03
Din xadimləri icbari tibbi sığorta barədə maarifləndirmə kampaniyasında iştirak edirlər
26 İyul 2024 15:34