Rəsmi vebsayt linkləri .gov.az ilə bitir.
Dövlət qurumları .gov.az domenləri (məsələn, my.gov.az) vasitəsilə əlaqə qurur. Rəsmi vebsaytların siyahısı
Təhlükəsiz vebsaytlar HTTPS protokolundan istifadə edir.
Əlavə təhlükəsizlik tədbiri kimi, URL çubuğunda kilid işarəsinin və ya https:// prefiksinin mövcudluğunu yoxlayın. Həssas məlumatlarınızı yalnız rəsmi və təhlükəsiz saytlarda paylaşın.19.09.2025, 14:56
İcbari Tibbi Sığorta üzrə Dövlət Agentliyi (Agentlik) Azərbaycan Tibb Universitetinin (ATU) birinci kurs tələbələri üçün icbari tibbi sığorta mövzusunda maarifləndirmə sessiyaları təşkil edib. Koreya Beynəlxalq Əməkdaşlıq Agentliyi (KOICA) və ATU-nun dəstəyi ilə keçirilən tədbirin əsas məqsədi tibb sahəsində təhsil alan gənclərin icbari tibbi sığorta sistemi barədə məlumatlılığını artırmaq olub. Tədbirə ümumilikdə 600-dən çox tələbə qatılıb.
ATU-nun Tədris işləri üzrə prorektoru Anar Ağayev bu cür sessiyaların tələbələrin gələcək peşə fəaliyyətinə mühüm töhfə verəcəyini qeyd edib.
Agentliyin İdarə Heyəti sədrinin müşaviri Nelli Veysova tədbirin təşkilinə verdikləri dəstəyə görə KOICA və ATU rəhbərliyinə minnətdarlığını bildirib. O, icbari tibbi sığortanın əhəmiyyətli səhiyyə islahatlarından biri olduğunu vurğulayıb və gələcəyin həkimlərinin bu sistemin mühüm iştirakçıları sırasında yer aldığını qeyd edib.
KOICA Azərbaycan Nümayəndəliyinin direktoru Sulim Hvanq çıxışında təşkilatın Azərbaycanla uzunmüddətli əməkdaşlıq təcrübəsinə toxunaraq, bu sessiyaların ölkənin səhiyyə sisteminə əhəmiyyətli dərəcədə töhfə verdiyini söyləyib.
KOICA Məzunlar Assosiasiyasının (KOAZ) prezidenti, TƏBİB-in Tibb müəssisələrində təlimlərin idarəolunması şöbəsinin müdiri Emil İskəndərov isə KOICA ilə Azərbaycan arasında səhiyyə sahəsində mövcud əməkdaşlığın yüksək səviyyədə olduğunu vurğulayaraq, bu istiqamətdə layihələrin davamlı olacağına əmin olduğunu deyib.
Açılış mərasimindən sonra tələbələrə “İcbari tibbi sığorta nədir?” mövzusunda təqdimat nümayiş etdirilib, həmçinin icbari tibbi sığorta çərçivəsində tibbi xidmətlərdən istifadə qaydalarını izah edən animasiyalar göstərilib. Sessiyanın sonunda isə tələbələrin əldə etdikləri bilikləri möhkəmləndirmək məqsədilə interaktiv oyun keçirilib və qaliblər xüsusi hədiyyələrlə mükafatlandırılıb.
Bütün xəbərlər