“Tibbi Koreya Akademiyası” adlı onlayn klinik təlim proqramı keçiriləcək

27.11.2020, 12:27

Koreya Səhiyyə Sənayesinin İnkişafı İnstitutu (KHIDI – Korea Health Industry Development Institute) 13-31 dekabr 2020-ci il tarixlərində “Tibbi Koreya Akademiyası” (MKA – Medical Korea Academy) adlı onlayn klinik təlim proqramı keçirəcək.

Təlim proqramı klinik fəaliyyətlə məşğul olan tibb işçiləri, səhiyyədə informasiya və kommunikasiya texnologiyaları üzrə çalışan tibb və qeyri-tibb mütəxəssisləri üçün nəzərdə tutulmuşdur.

Təlim proqramına qeydiyyat ödənişsizdir.

Təlim proqramında iştirak etmək üçün anketin doldurularaq imzalanmış və skan edilmiş formasının 4 dekabr 2020-ci il tarixinə qədər qeyd olunan hər iki e-poçt ünvanına göndərilməsi tələb olunur: mkaglobal@khidi.or.kr; shasanova@its.gov.az

Anketi doldurarkən iştirak etmək istədiyiniz bir və ya bir neçə kursu seçə bilərsiniz.

Təlim ingilis dilində keçiriləcək.

Təlim proqramı aşağıdakı kurslardan ibarətdir:

Cərrahi bacarıqlar üzrə 3 kurs:
1.   Hepatobiliar və mədəaltı vəz cərrahiyyəsi
2.   Qastrointestinal cərrahiyyə
3.   Kolorektal cərrahiyyə

Daxili xəstəliklər üzrə 3 kurs:
4.   Endoskopiya bacarıqları
5.   Exokardioqrafiya bacarıqları
6.   İnfeksiyaya nəzarət bacarıqları
7.   Səhiyyədə informasiya və kommunikasiya texnologiyaları üzrə kurs

Kurs aşağıdakı mövzuları əhatə edəcək:
•   Səhiyyədə informasiya və kommunikasiya texnologiyaları (İKT)
•   Elektron tibbi qeydiyyat sistemi
•   Səhiyyədə böyük məlumat bazası (Big Data) və süni intellekt (AI)
•   Səhiyyədə IoT və 5G sisteminin tətbiqi
•   Dəqiq təbabət təşəbbüsü (PMI - Precision Medicine Initiative)

Kursu müvəffəqiyyətlə bitirən iştirakçılar SERTİFİKATLA təmin olunacaq.

Kursda iştirak üçün müraciətiniz təsdiq olunduğu təqdirdə sizə KHIDI tərəfindən elektron dərslərə qoşulmaq üçün link göndəriləcək.