2021-ci ilin aprel ayı ərzində 59 şəhər və rayonun əhalisinə 1 milyon 400 mindən çox tibbi xidmət göstərilib

20.05.2021, 15:26

İcbari tibbi sığortanın tətbiq olunduğu tibb müəssisələri tərəfindən İcbari Tibbi Sığorta üzrə Dövlət Agentliyinə (Agentlik) təqdim edilən ilkin hesabatlara əsasən, bu ilin aprel ayı ərzində 59 şəhər və rayonda vətəndaşlara 1 476 971 tibbi xidmət göstərilib. Belə ki, bu müddətdə tibb müəssisələri, onların struktur bölmələri və müalicə diaqnostika mərkəzlərinə 683 071 dəfə müraciət daxil olub. Müraciətlər üzrə göstərilən tibbi xidmətlərin 1 259 230-u ambulator, 217 741-i isə stasionar şəraitdə göstərilib.

Hesabatların nəticələri əsasında cari ilin aprel ayında regionlar üzrə əhaliyə göstərilən tibbi xidmətlərə dair bir neçə statistik göstəricini təqdim edirik:

Əhalinin hər 1000 (min) nəfərinə tibb müəssisələrinə olunan müraciət sayına əsasən, ilk onluqda yer alan şəhər və rayonlar: Mingəçevir şəhəri (528), Şirvan şəhəri (246), Yevlax rayonu (204), Gəncə şəhəri (194), Ağdaş (192), Qəbələ (187), Zaqatala (186), Göygöl (186), Göyçay (171) və Xaçmaz rayonları (170).

Ən çox xidmət göstərmiş tibb müəssisələrinin ilk onluğu: Mingəçevir Şəhər Mərkəzi Xəstəxanası (154 448), Gəncə Birləşmiş Şəhər Xəstəxanası (127 124), Xaçmaz (75 845), Yevlax (64 474), Quba (51 627), Ağdaş (49 849), Zaqatala (41 697), Göyçay (40 894), Şəki (40 725) və Qusar Rayon Mərkəzi Xəstəxanaları (36 487).

Ən çox ambulator xidmət göstərmiş tibb müəssisələrinin ilk onluğu: Mingəçevir Şəhər Mərkəzi Xəstəxanası, Gəncə Birləşmiş Şəhər Xəstəxanası, Xaçmaz, Yevlax, Quba, Zaqatala, Ağdaş, Şəki, Göyçay və Beyləqan Rayon Mərkəzi Xəstəxanaları.

Ən çox stasionar xidmət göstərmiş tibb müəssisələrinin ilk onluğu: Gəncə Birləşmiş Şəhər Xəstəxanası, Mingəçevir Şəhər Mərkəzi Xəstəxanası, Xaçmaz, Quba, Ağdaş, Qobustan, Qusar, Bərdə, Şirvan və Yevlax Rayon Mərkəzi Xəstəxanaları.

Tibb müəssisələrinə müraciətlərin çoxu tibbi müayinə (hərbi xidmətə çağırılanların müayinəsi daxil olmaqla), qan dövranı sistemi, endokrin sistemin xəstəlikləri, maddələr mübadiləsi və qidalanma pozğunluğu, həzm, sidik-cinsiyyət, tənəffüs, sümük və əzələ sisteminin və birləşdirici toxumanın xəstəlikləri, habelə mamalıq və ginekologiya, sinir sistemi xəstəlikləri, gözün və onun əlavə aparatının xəstəlikləri ilə bağlı olub.

Məlumat üçün bildirək ki, ilkin hesablamalara görə, 2021-ci ilin yanvar-mart ayları ərzində 1 243 nəfər dövlət tibb müəssisələrində aparılması mümkün olmayan, habelə xüsusi tibbi təchizat və təminat tələb edən əməliyyatlarla bağlı müqaviləli tibb müəssisələrinə yönləndirilmişdir ki, bu şəxslərin 53 nəfərini uşaqlar təşkil etmişdir. Sayca ürək və damar cərrahiyyəsi (753), oftalmologiya (165), neyrocərrahiyyə (110), urologiya (106) və travmatologiya (87) üzrə əməliyyatlar çoxluq təşkil edib. Uşaqlarda isə ürək və damar cərrahiyyəsi üzrə əməliyyatlarının sayı 37 olub. Qeyd edək ki, tibb müəssisələri tərəfindən stasionarda cərrahi profil üzrə məlumatların elektron reyestrdə qeydiyyatı və emalı davam edir.

2021-ci ilin aprel ayı ərzində tibbi ərazi bölmələri (TƏB) üzrə göstərilmiş tibbi xidmət sayına görə ardıcıllıq aşağıdakı kimidir:

Bərdə-Yevlax TƏB (323 061), Quba-Xaçmaz TƏB (208 460), Şəki-Zaqatala TƏB (200 690), Gəncə TƏB (186 959), Göyçay-Kürdəmir TƏB (110 076), Dağlıq Şirvan TƏB (103 678), Şəmkir-Tovuz TƏB (98 691), Ağdam-Ağcabədi TƏB (79 652), İmişli-Sabirabad TƏB (66 910), Lənkəran TƏB (54 310) və Cəlilabad-Salyan TƏB (44 484).

01.01.2020-ci il tarixinə olan rəsmi məlumata əsasən icbari tibbi sığortanın tətbiq edildiyi 59 inzibati ərazi vahidləri üzrə qeydiyyatda olan əhalinin sayı 6 577 600 nəfər təşkil edir.

Qeyd edək ki, bütün ölkə üzrə aprel ayı ərzində 557 152 nəfərə tibbi xidmət göstərilib.