Qubada “İcbari tibbi sığorta və sosial əhəmiyyətli xəstəliklər” mövzusunda elmi-praktik konfrans keçirilib

16.09.2019, 10:42

14 sentyabr 2019-cu il tarixində Quba rayonunda “İcbari tibbi sığorta və sosial əhəmiyyətli xəstəliklər” mövzusunda II elmi-praktik konfrans keçirilib. Konfransın məqsədi icbari tibbi sığortanın tətbiq edildiyi pilot ərazilərdə (Mingəçevir şəhəri, Yevlax və Ağdaş rayonları) sakinlər tərəfindən ən çox müraciət edilən və tibbi xidmətin göstərilməsi üçün müəyyən imkanlar tələb edən ürək-damar və həzm traktı xəstəliklərinin müayinə və müalicəsində tətbiq edilən yeni üsulları öyrənmək olub. Tədbirə Sumqayıt şəhərindən, Siyəzən, Şabran, Quba, Qusar və Xaçmaz rayonlarından həkimlər qatılıb.

Konfransı giriş sözü ilə açan İcbari Tibbi Sığorta üzrə Dövlət Agentliyinin Regional mərkəzlərlə iş şöbəsinin müdiri Şükür Eyvazov qurumun sədri cənab Zaur Əliyevin salamını və tədbirin uğurla keçməsi arzusunu çatdıraraq “İcbari tibbi sığortanın məqsəd və vəzifələri” mövzusunda çıxış edib.

Sistemin üstünlüklərindən danışan şöbə müdiri bildirib ki, icbari tibbi sığortanın tətbiqi əhalinin tibbi xidmətlərə əlçatanlığını təmin edəcək və səhiyyə xərcləri ilə bağlı maliyyə yükünü azaldacaq. Çıxışdan sonra Agentliyin əməkdaşı iştirakçıların suallarını cavablandırıb.

“İcbari tibbi sığortanın tətbiqi Mingəçevir şəhər Mərkəzi Xəstəxanasının timsalında” mövzusu ilə çıxış edən xəstəxananın direktoru Könül Ələkbərov pilot layihənin uğurlarından danışıb. O qeyd edib ki, icbari tibbi sığortanın tətbiqindən sonra tibb müəssisəsinin maddi-texniki bazası yaxşılaşdırılıb və kadr potensialı gücləndirilib.

Konfransda müxtəlif ixtisaslı həkimlər tərəfindən hipertoniya, şəkərli diabet və ürək-damar xəstəlikləri, mədə-bağırsaq xəstəliklərinin diaqnostikası və müalicəsində ən son yeniliklər, ağciyərlərin xroniki obstruktiv xəstəliyinin diaqnostikası və müalicəsinin müasir prinsipləri və s. mövzularda məruzələr dinlənilib.

Sonda konfrans iştirakçılarına sertifikatlar təqdim olunub.