Kənd təsərrüfatında kimyəvi risk: Fertil yaşdakı qadınların sağlamlığına təsir

12.05.2024, 14:20

Kənd təsərrüfatı sahəsində çalışan fertil yaş dövründəki (15-49 yaş) qadınların pestisidlər və aqrokimyəvi maddələrlə mütəmadi təmasda olması onların sağlamlığına, xüsusilə də hamiləlik dövründə ana və körpənin inkişafına mənfi təsir göstərə bilər. Araşdırmalar göstərir ki, bu cür kimyəvi maddələrin uzunmüddətli təsiri hamiləliyin erkən mərhələsində dölün inkişafında sinir sistemi pozuntuları, ürək və tənəffüs problemləri, erkən doğuş kimi riskləri artırır. Bundan əlavə, hamiləlikdən sonra da pestisidlərə məruz qalmış anadan körpəyə ana südü vasitəsilə toksik maddələrin keçməsi körpənin sağlamlığı üçün ciddi təhlükə yarada bilər.

Bu risklərin minimuma endirilməsi məqsədilə bir sıra qoruyucu tədbirlərin görülməsi vacibdir. Xüsusilə, kənd təsərrüfatında çalışan qadınların pestisidlərin zərərli təsirlərindən qorunması üçün fərdi mühafizə vasitələrindən – maska, əlcək və qoruyucu geyimlərdən istifadə etməsi, pestisid tətbiq edilən sahələrdə müəyyən müddət ərzində insanların girişinin məhdudlaşdırılması və hamilə qadınların bu maddələrlə birbaşa təmasdan yayınması əsas profilaktik tədbirlər sırasındadır.

Gələcəkdə doğulacaq uşaqların sağlamlığını təmin etmək və kənd təsərrüfatı sektorunda çalışan qadınların reproduktiv sağlamlığını qorumaq məqsədilə genişmiqyaslı maarifləndirmə və təhlükəsizlik tədbirlərinin həyata keçirilməsi mühüm əhəmiyyət kəsb edir.

Bütün xəbərlər

Paylaş: