Ümumdünya Antibiotiklərlə bağlı Maarifləndirmə həftəsi çərçivəsində Gəncədə dəyirmi masa keçirilib

19.11.2019, 14:12

19 noyabr 2019-cu il tarixində Ümumdünya Səhiyyə Təşkilatının (ÜST) Azərbaycandakı nümayəndəliyi, Səhiyyə Nazirliyi və İcbari Tibbi Sığorta üzrə Dövlət Agentliyinin (Agentlik) birgə təşkilatçılığı ilə Ümumdünya Antibiotiklərlə bağlı Maarifləndirmə həftəsi çərçivəsində Gəncə şəhərində dəyirmi masa keçirilib.  Tədbirin keçirilməsində məqsəd maraqlı tərəfləri bir araya toplayaraq sözügedən mövzu ətrafında müzakirələr aparmaq və əhali arasında maarifləndirmənin səviyyəsini artırmaq üçün səmərəli həll yollarını müəyyənləşdirmək olub.

Tədbirdə ÜST, Səhiyyə Nazirliyi, Agentliyin və pilot tibb müəssisələrinin məsul əməkdaşları iştirak ediblər. ÜST-nin Azərbaycandakı nümayəndəsi Dr. Hande Harmancı açılış nitqi ilə çıxış edərək bu həftənin keçirilməsinin əhəmiyyətini vurğulayıb. Təşkilatın mütəxəssisi Dr. Cəvahir Süleymanova dünyada antibiotiklərə davamlılıqla bağlı vəziyyət, Səhiyyə Nazirliyinin nümayəndələri Nəzifə Mürsəlova və Həqiqət Qədirova Azərbaycanda antibiotiklərə qarşı davamlılıq, onların təsiri ilə bağlı təqdimatlar ediblər.

Agentliyin məsul əməkdaşı Şərafət İsmayılova antibiotiklərdən istifadə üzrə nəzarət mexanizmləri, İctimai Səhiyyə və İslahatlar Mərkəzinin nümayəndəsi İnarə Makayeva isə ölkədə ÜST-nin dəstəyi ilə bu sahədə aparılan maarifləndirmə işlərindən danışıblar.

Qeyd edək ki, sözügedən həftə çərçivəsində tibb işçilərinin maarifləndirilməsi üçün Mingəçevir şəhərində də təlimlərin keçirilməsi planlaşdırılıb. Əhali arasında antibiotiklərlə bağlı məlumatlılığın səviyyəsini öyrənmək üçün isə Bakı və Sumqayıtda sorğuların keçirilməsi nəzərdə tutulub. 

Hər il noyabr ayında keçirilən Ümumdünya Antibiotiklərlə bağlı Maarifləndirmə həftəsinin məqsədi qlobal maarifləndirmənin səviyyəsini artırmaq, antibiotiklərdən düzgün istifadəni təbliğ etmək, əhali və tibb işçiləri ilə ən yaxşı təcrübələri bölüşərək antibiotiklərə qarşı davamlılığın qarşısını almaqdır.

Antibiotiklər həmişə müasir tibbin əsas təməli hesab olunurlar. Lakin insan və heyvanlarda antibiotiklərdən həddindən artıq və qeyri-düzgün istifadə antibiotiklərə qarşı davamlılığın yaranmasını sürətləndirir. Antibiotiklərə qarşı davamlılıq mikroblarda müalicə üçün istifadə olunan tibbi preparatlara qarşı müqavimətin yaranmasına gətirib çıxarır.
 

Bütün xəbərlər

Paylaş: