Agentlik, TƏBİB və Dünya Bankı arasında görüş keçirilib

31.01.2022, 17:02

31 yanvar 2022-ci il tarixində İcbari Tibbi Sığorta üzrə Dövlət Agentliyinin (Agentlik), Tibbi Ərazi Bölmələrini İdarəetmə Birliyinin (TƏBİB) və Dünya Bankının rəhbər nümayəndələrinin iştirakı ilə işçi görüş keçirilib.

Görüşdə Agentliyin İdarə Heyətinin sədri Zaur Əliyev, TƏBİB-in İdarə Heyətinin sədri vəzifəsini icra edən Vüqar Qurbanov, Agentliyin aidiyyəti struktur bölmələrinin rəhbərləri iştirak ediblər. Dünya Bankını isə əməliyyatlar üzrə baş mütəxəssis Səidə Bağırlı və Dünya Bankının müvafiq sahələr üzrə ekspertləri təmsil ediblər.

“Elektron Səhiyyə və Tibbi İddiaların İdarə edilməsi Sisteminin İnkişafı” üzrə texniki yardım layihəsi çərçivəsində keçirilən görüşdə tibbi iddiaların idarə edilməsi və əlaqədar sahələrin qiymətləndirilməsinin əsas nəticələri, 2022-2026-cı illər üzrə Azərbaycanın Milli Səhiyyə İnformasiya Strategiyasının hazırlanması ilə bağlı müzakirələr aparılıb.

Yaponiyanın “İqtisadi və Sosial İnkişaf Proqramı”nın dəstəyi ilə həyata keçirilən bu layihə çərçivəsində Dünya Bankının ekspertlərinin texniki vəziyyətin və infrastruktur potensialın qiymətləndirilməsi məqsədilə seçilmiş səhiyyə müəssisələrinə səfərləri planlaşdırılıb. Habelə iki illik layihənin sonunda sözügedən istiqamətlər üzrə Səhiyyə Nazirliyi, Agentlik, TƏBİB-ə beynəlxalq təcrübənin tətbiq olunması və yol xəritəsinin təqdim olunması nəzərdə tutulub.