BMT-nin “Uşaq hüquqları haqqında Konvensiyası” üzrə beşinci və altıncı birgə dövri məruzəsinin təqdimatı keçirilib

24.01.2023, 17:00

Birləşmiş Millətlər Təşkilatının Uşaq Hüquqları Komitəsinin İsveçrə Konfederasiyasının Cenevrə şəhərində keçirilən 92-ci sessiyasında Azərbaycan Hökumətinin BMT-nin “Uşaq hüquqları haqqında Konvensiyası” üzrə beşinci və altıncı birgə dövri məruzəsinin təqdimatı keçirilib.

Tədbirdə çıxış edən İcbari Tibbi Sığorta üzrə Dövlət Agentliyinin İdarə Heyəti sədrinin müavini Nigar Bayramova hamilə qadınlar və uşaqlar üçün icbari tibbi sığorta çərçivəsində qarşılanan tibbi xidmətlər, ana və uşaqların sağlamlığının müdafiəsi, uşaqlara, xüsusilə vaxtından əvvəl doğulan körpələrə göstərilən tibbi xidmətlərin keyfiyyətinin artırılması istiqamətində görülən tədbirlərdən danışıb və iştirakçıları maraqlandıran sualları cavablandırıb.

Qeyd edək ki, Ailə, Qadın və Uşaq Problemləri üzrə Dövlət Komitəsinin sədri Bahar Muradovanın rəhbərlik etdiyi Azərbaycan nümayəndə heyətinin tərkibində Baş Prokurorluq, Daxili İşlər Nazirliyi, İqtisadiyyat Nazirliyi, Səhiyyə Nazirliyi, Elm və Təhsil Nazirliyi, Əmək və Əhalinin Sosial Müdafiəsi Nazirliyi, Gənclər və İdman Nazirliyi, Kənd Təsərrüfatı Nazirliyi, Dövlət Statistika Komitəsi, Xarici İşlər Nazirliyi, Ədliyyə Nazirliyi, Rəqəmsal İnkişaf və Nəqliyyat Nazirliyi, Dövlət Miqrasiya Xidməti, Qida Təhlükəsizliyi Agentliyi və Maliyyə Nazirliyinin də nümayəndələri yer alıblar.