Agentliyinin əməkdaşları üçün korrupsiyaya qarşı mübarizə mövzusunda təlim keçirilib
23 Fevral 2023 15:47Korrupsiyaya qarşı mübarizəyə yönəlmiş təlimdə iştirak etmiş İcbari Tibbi Sığorta üzrə Dövlət Agentliyinin 70 əməkdaşına sertifikatlar təqdim olunub. “Korrupsiya hüquqpozmaları və onlara qarşı mübarizə” və “Etik davranış qaydaları” mövzularını əhətə edən təlimlər ötən ilin dekabr və cari ilin yanvar aylarında keçirilib.
Təlimlər “Şəffaflıq Azərbaycan” Korrupsiyaya Qarşı Mübarizə İctimai Birliyinin icraçı direktoru Əliməmməd Nuriyev və həmin İctimai Birliyin eksperti Zaur İbrahimov tərəfindən tədris edilib.
Təlimdə “Etik davranış qaydaları” və “Korrupsiya ilə əlaqədar hüquqpozmalar və bu hüquqpozmalara görə məsuliyyət” mövzularında təqdimatlar nümayiş olunub. Təlim iştirakçılarına etik davranış qaydaları, dövlət qulluğu etikası ilə bağlı prinsip və dəyərlərin məqsədi, etik davranış qaydalarının pozulmasına görə məsuliyyət, korrupsiya ilə əlaqədar hüquqpozmaların subyektləri, korrupsiya ilə əlaqədar hüquqpozmalar barədə müraciətə baxılması və s. məsələlər barədə məlumatlar verilib.
Etik davranış qaydaları və korrupsiya ilə əlaqədar hüquqpozmalara dair konkret keyslər iştirakçılarla birgə təhlil edilib.
Qeyd edək ki, təlim Azərbaycan Respublikası Prezidentinin 27 fevral 2020-ci il tarixli 1859 nömrəli Sərəncamı ilə təsdiq edilmiş “Açıq hökumətin təşviqinə dair 2020-2022-ci illər üçün Milli Fəaliyyət Planı”nın icrası məqsədilə təşkil edilib.