"Sağlamlıq üçün Həmrəylik Təşəbbüsü"nün yekun nəticələri təqdim edilib
21 İyun 2022 10:08Avropa İttifaqının və Ümumdünya Səhiyyə Təşkilatının birgə layihəsi olan "Sağlamlıq üçün Həmrəylik Təşəbbüsü"nün yekun nəticələri təqdim edilib. Layihə rəhbəri Tural Qulu layihənin həyata keçirildiyi dövr ərzində əldə edilmiş nailiyyətlərdən bəhs edən təqdimatla çıxış edib.
Tədbirdə Səhiyyə Nazirliyi, İcbari Tibbi Sığorta üzrə Dövlət Agentliyi, TƏBİB və digər milli tərəfdaşlara dəstək olaraq ölkədə COVID-19 pandemiyasına hazırlıq və cavab tədbirləri istiqamətində görülən işlərin əhəmiyyəti vurğulanıb.
Tədbirdə çıxış edən İcbari Tibbi Sığorta üzrə Dövlət Agentliyinin Marketinq və ictimaiyyətlə əlaqələr departamentinin rəhbəri Aynurə Əhmədova, "Layihə çərçivəsində TƏBİB-in nəzdindəki dövlət tibb müəssisələrinin ictimaiyyətlə əlaqələr üzrə mütəxəssisləri üçün keçirilən təlim çox səmərəli oldu. COVID-19 pandemiyası kontekstində səhiyyədə fövqəladə hallar zamanı risk kommunikasiyası, dezinformasiyanın fəsadları və onların aradan qaldırılması mövzularında tədris edilən təlim sessiyaları ictimaiyyətlə əlaqələr sahəsində fəaliyyətə yeni başlamış mütəxəssislərin, habelə təcrübəli mütəxəssislərin bilik və bacarıqlarının artırılmasına xidmət edirdi", - deyə bildirib.
TƏBİB-in İdarə Heyəti sədrinin müşaviri Firəngiz Əliyeva, "Səhiyyə işçilərinin bacarıqlarının artırılması istiqamətində ÜST-nin dəstəyi ilə səhiyyə işçilərinin COVID-19-a nəzarət, İPN və COVID-19 hallarının idarə edilməsi üzrə təlimçi kimi hazırlanması, COVID-19 hallarının, o cümlədən uşaqlar, hamilə qadınlar və şəkərli diabet xəstələrində və trombotik ağırlaşmalar müşahidə olunan hallarda COVID-19-un klinik idarəedilməsinə dair keçirilən təlimlər olduqca faydalı oldu", - deyib.
"Sağlamlıq üçün Həmrəylik Təşəbbüsü" gələcəkdə baş verə biləcək pandemiyalara qarşı dayanıqlı cavab potensialının formalaşdırılmasına yardım göstərilməsini hədəfləyir.